BOSTON, Etazini — Chantèz ayisyèn Rutshelle Guillaume reyalize yon bèl pèfòmans nan okazyon gwo konsè li te bay dimanch 11 oktòb 2026 la, nan MGM Music Hall at Fenway, nan Boston, pou selebre 12 ane karyè mizikal li.
Konsè sa a, ki te pote non « 12 ERA », te rasanble anpil fanatik mizik ayisyèn ki te vin selebre chemen atistik chantèz la ap trase depi plis pase yon deseni.
Pami moman ki te atire atansyon piblik la, te gen patisipasyon chantèz Anie Alerte, ki te pataje sèn nan ak Rutshelle Guillaume. De atis yo te entèprete ansanm chante « Rete La », yon pèfòmans ki te mete konplisite mizikal yo an valè devan fanatik yo.
Prezans Anie Alerte nan konsè sa a bay sware a yon lòt dimansyon, sitou paske de chantèz yo se pami figi enpòtan nan mizik ayisyèn kontanporen an.
Yon sware ki make 12 ane karyè Rutshelle Guillaume
Pandan konsè a, Rutshelle Guillaume te prezante plizyè mizik nan repètwa li, pandan piblik la t ap chante ansanm avè l. Chantèz la te pwofite okazyon an pou l selebre travay li, pèseverans li ak relasyon li konstwi ak fanatik li yo pandan 12 ane karyè li.
Lòt atis te patisipe nan evènman an tou, tankou Richard Cavé, chantè gwoup KAI a, ki te monte sou sèn nan pou entèprete mizik « Tolere W » ak Rutshelle Guillaume.
Konsè a te reprezante yon moman enpòtan non sèlman pou chantèz la, men tou pou mizik ayisyèn ak dyaspora a, ki kontinye sipòte atis li yo sou gwo sèn entènasyonal yo.
Mizik ayisyèn kontinye fè wout li
Pèfòmans Rutshelle Guillaume ak Anie Alerte la montre enpòtans kolaborasyon ant atis ayisyen yo genyen nan pwomosyon mizik peyi a. Lè atis yo reyini sou menm sèn nan, sa bay fanatik yo okazyon pou yo viv bèl moman epi dekouvri lòt fasèt talan yo.
Konsè « 12 ERA » a antre nan lis gwo etap Rutshelle Guillaume ap franchi nan karyè li, pandan li kontinye chèche elaji prezans li sou sèn entènasyonal la.
Zen San Kanpe ap kontinye pote nouvèl sou mizik, kilti ak divètisman ayisyen.
