Freedom Haulers
pou ede veteran ameriken yo jwenn travay
Prezidan Donald Trump anonse lansman yon nouvo pwogram federal ki rele Freedom Haulers, yon inisyativ ki vize ede ansyen sòlda ameriken (veteran) jwenn travay kòm chofè kamyon komèsyal atravè Etazini.
Daprè administrasyon an, pwogram nan pral fasilite tranzisyon veteran yo soti nan sèvis militè pou antre dirèkteman nan sektè transpò a. Veteran ki te konn kondi gwo machin militè yo ka benefisye de pwosedi ki pi senp pou jwenn Commercial Driver’s License (CDL) yo, san yo pa oblije repase kèk tès pratik yo te deja metrize pandan sèvis militè yo.
Administrasyon Trump la fè konnen objektif pwogram nan se mete plis veteran kalifye dèyè volan gwo kamyon yo, pandan li ede konbat mank chofè kamyon ki egziste nan peyi a. Pwogram nan gen ladan tou patenarya ak konpayi transpò ki pare pou anboche veteran yo epi bay yo opòtinite pou jwenn bon salè ak benefis.
Sekretè Transpò Ameriken an, Sean Duffy, deklare veteran yo deja genyen disiplin, eksperyans ak kapasite ki nesesè pou fè travay sa a avèk siksè. Daprè li, Freedom Haulers ap ede diminye baryè administratif yo epi fè veteran yo antre pi vit nan mache travay la.
Pwogram sa a se youn nan nouvo mezi administrasyon Trump la mete an plas pou ankouraje anbochaj veteran ameriken yo epi ranfòse endistri transpò kamyon Ozetazini.
Zen San Kanpe 