OKAP, AYITI — American Airlines anonse li pral rekòmanse sèvis vòl li yo ant Miami (MIA) ak Okap (Cap-Haïtien) apati 1ye novanm 2026. Se premye gwo konpayi avyon ameriken ki konfime retou li ann Ayiti depi plizyè konpayi te sispann vòl yo nan fen ane 2024 akòz pwoblèm sekirite.
Konpayi an fè konnen li pral opere yon vòl dirèk chak jou ant Miami ak Okap ak avyon Boeing 737. Desizyon sa a espere fasilite vwayaj pou anpil Ayisyen k ap viv Ozetazini ki vle vizite fanmi yo oswa fè biznis nan nò peyi a.
Malgre nouvèl sa a, sèvis la konsène sèlman Ayewopò Entènasyonal Okap. Pa gen okenn anons pou kounye a sou rekòmansman vòl American Airlines pou Pòtoprens, kote sitiyasyon sekirite a kontinye poze defi.
Retou American Airlines la reprezante yon etap enpòtan pou transpò ayeryen ann Ayiti epi li ka ankouraje lòt konpayi avyon entènasyonal yo konsidere retounen nan mache ayisyen an si kondisyon sekirite yo kontinye amelyore.
Zen San Kanpe ap kontinye swiv dosye sa a epi l ap pote tout dènye enfòmasyon yo ba ou.
Zen San Kanpe 