Kenskoff — Direktè Jeneral Polis Nasyonal d Ayiti (PNH), Vladimir Paraison, te deplase Kenskoff apre atak sanglan ki te frape komin nan nan lannwit 23 pou rive 24 out 2026.
Vizit Paraison an te fèt nan yon moman kote Kenskoff ap fè fas ak youn nan pi gwo trajedi sekirite li yo. Dapre Nasyonzini, omwen 47 moun pèdi lavi yo, pami yo senk timoun, epi plis pase 50 lòt moun kidnape pandan atak la.
Sou plas, Vladimir Paraison te vizite komisarya Kenskoff la pou evalye sitiyasyon an epi rankontre ak otorite lokal yo. Li te bay enstriksyon pou ranfòse prezans plizyè inite espesyalize PNH nan zòn ki afekte yo.
Paraison te prezante kondoleyans li bay fanmi viktim yo epi li mande pou yon ankèt fèt sou fason gwoup ame yo te rive antre nan komin nan. Dapre enfòmasyon ki pibliye yo, DCPJ dwe mennen ankèt sou sikonstans atak la, tankou posiblite neglijans oswa konplisite.
Direktè PNH la deklare lapolis pap rete san repons devan zak vyolans sa yo. Li te asire popilasyon Kenskoff la PNH ap rete bò kote yo pou ranfòse sekirite nan komin nan.
Pandan vizit la, sitiyasyon an te toujou trè delika. Plizyè fanmi t ap kriye moun yo pèdi, pandan kestyon sou kapasite otorite yo pou pwoteje popilasyon an ap ogmante.
Atak Kenskoff la relanse gwo deba sou sekirite nan peyi a ak sou kapasite PNH ansanm ak lòt fòs sekirite yo pou anpeche gwoup ame yo kontinye pran kontwòl nouvo teritwa.
